Ақтөбе студенттері латын әліпбиіне көшудің маңыздылығын түсіндіру тобымен кездесті

Құрамына саясаткерлер мен қоғам қайраткерлері енген қоғамдық топ латын әліпбиіне көшудің маңыздылығын түсіндірді, деп хабарлайды Aktobenews.kz тілшісі.

 Ақтөбеге арнайы ат басын бұрған топ үшін жастардың ой-пікірі маңызды болды. Сондықтан алдымен студенттермен кездесу ұйымдастырылды. Сақтаған Бәйішев атындағы Ақтөбе университеті мен Қ.Жұбанов атындағы Ақтөбе өңірлік мемлекеттік университетінің студенттері саясаттанушы Ерлан Саиров, Әміржан Қосанов, блогер Ғалым Байтук және Еуразия ұлттық университетінің доценті, белгілі журналист Қанат Әуесбаймен кездесті.

«Адам үш нәрсе төңірегінде топтасады. Үш құндылық бар. Ол: жер, тіл, дін. Үш нәрсеге қауіп-қатер төнген тұста адам тік тұрады, жұмыла жұдырық болады, бірден талқыға салып, сұрақтарын шешуге бел шеше кіріседі. Тіл, латын әліпбиіне көшу мәселесі туындаған кезде халық жұмылып, талқыға салып жатыр.  Бұған дейін бірнеше облыстарды аралап, ұсыныстар мен тілектерді тыңдап келдік. Әлемнің 4,5 миллиард адамы қолданатын, адами коммуникацияны тиімді жолға қоюға мүмкіндік беретін латын әліпбиіне өтуіміз бізге бүкіл әлемдік игіліктерге қол жеткізуге, өз игілігімізге жаратуға мүмкіндік береді», — деді Еуразия ұлттық университетінің доценті, белгілі журналист Қанат Әуесбай.

Қоғамдық топ мүшелері белсенді, көзі ашық, көкірегі ояу жастарға қолқа салды. Олар ауылға барған кезде, өз замандастары арасында латын әліпбиіне көшудің маңыздылығы туралы айтса, бірігіп атқарылған жұмыс өз нәтижесін береді. Азаматтық миссияны орындау студенттің парызы.

«Тәуелсіздік алғаннан бері қоғамда қазақ тілін кириллицадан латынға көшіру туралы ойлар айтылды. 2006 жылы Елбасы Нұрсұлтан Назарбаев өз сөзінде идеяны жария етіп, қоғам алдына қойды. Содан бері 11 жыл өтті. Ал «Болашаққа бағдар: рухани жаңғыру» мақаласында идея нақты формасына ие болып, қазір құжаттар қабылданып жатыр. Бұл үлкен процесс. Оңай емес. Біріншіден, латын әліпбиіне көшудің саяси шешімінің қабылдануы дұрыс. Екіншіден, нақты нұсқасы, графика, үлгісіне қоғам өз пікірін айта алады. Мен латын әліпбиіне көшуді қолдаймын. Қазақтың тәуелсіздігі, жер тұтастығы, тілі, ділі, қазақтың геосаяси әлемдегі орны дегенде баршамыз бірге болуымыз тиіс. Бастысы, жастар қолдауы керек», деді Әміржан Қосанов. 

Пікір қалдырыңыз

Просмотров: